Mingəçevirin xeyirxah insanı – Hacı Vüsal Əlibəyli

Zaman-zaman insanlar arasında belə bir fikir səslənir: “İndiki dövrdə yaxşı insan kimi yaşamaq çətindir.” Amma bu fikri təkzib edən, xeyirxahlığı ilə seçilən, cəmiyyətə faydalı olmaq üçün çalışan insanlar da var. Bu yazımızda belə insanlardan biri – Hacı Vüsal Əlibəyli haqqında bəhs edəcəyik. Onun adı Mingəçevir sakinlərinə yaxşı tanışdır və şəhərin ictimai həyatında xeyirxah əməlləri ilə yadda qalan şəxslərdəndir.

Vüsal Əlibəyli təkcə sözlə yox, əməli ilə də insanların köməyinə çatan, ehtiyacı olanlara dəstək göstərən bir vətəndaşdır. O, həm maddi, həm də mənəvi dəstəyə ehtiyacı olan şəxslərin yanında olmağa çalışır. Onun fəaliyyəti təkcə fərdi yardımlarla məhdudlaşmır – o, geniş kütlələrin rifahına xidmət edən təşəbbüsləri ilə də seçilir.

Məsələn, 8 Mart – Beynəlxalq Qadınlar Günü münasibətilə bir çox idarə və müəssisələrdə bayram tədbirləri keçirilərkən, Vüsal bəy daha fərqli bir addım ataraq, Mingəçevir şəhərindəki Xarı Bülbül şadlıq sarayında şəhid ailələrinin və qazilərin xanımlarını dəvət etmiş və onlarla birgə bayramı qeyd etmişdi. Bu, onun cəmiyyətin həssas təbəqələrinə olan dərin hörmətini və diqqətini nümayiş etdirir.

44 günlük Vətən müharibəsi zamanı və ondan sonra da Vüsal bəy daim əsgər ailələrinə, qazilərə, imkansız ailələrə yardım göstərib. O, heç vaxt diqqət və qayğıdan kənarda qalmalı olmayan bu insanlara dəstək olmağı özünə borc bilib.

Vüsal Əlibəylinin fəaliyyəti təkcə xeyriyyəçiliklə bitmir. O, həm də Mingəçevirin sosial həyatında fəallığı ilə seçilir, ictimai təşəbbüslərə dəstək verir və bir çox insana nümunə olur.

Bu gün isə Vüsal bəyin doğum günüdür. Bu münasibətlə onu ürəkdən təbrik edir, ona uzun ömür, möhkəm cansağlığı və gələcək fəaliyyətlərində uğurlar arzu edirik. Əminik ki, o, bundan sonra da yaxşılıq yolundan dönməyəcək və Mingəçevirin fəxri olaraq öz fəaliyyətini davam etdirəcəkdir.