Bunu  açıqlamasında Azərbaycan Milli İstiqlal Partiyasının sədri, Milli Məclisin deputatı Arzuxan Əlizadə deyib.

O bildirib ki, bu mənada “müharibədə qalib gəldi, sülhdə də qalib gəldi” fikri Azərbaycanın son illərdəki dövlətçilik strategiyasının mahiyyətini ifadə edən siyasi tezis kimi ortaya çıxır:

“30 ilə yaxın davam edən işğal dövründə beynəlxalq hüququn prinsipləri və BMT Təhlükəsizlik Şurasının qətnamələri Azərbaycanın ərazi bütövlüyünü dəstəkləsə də, onların icrası təmin olunmadı. 2020-ci ildə başlanan Vətən müharibəsi isə bu status-kvonu kökündən dəyişdi. Azərbaycan hərbi yolla ərazilərinin böyük hissəsini azad etdi və 2023-cü ilin sentyabrında həyata keçirilən 23 saatlıq antiterror əməliyyatı ilə dövlət suverenliyini bütün ərazisində bərpa etdi. Azərbaycan Prezidentinin sərəncamında da 20 sentyabr 2023-cü il ölkə ərazisində dövlət suverenliyinin tam bərpa edildiyi tarix kimi təsbit olunur”.

A.Əlizadə qeyd edib ki, əsas məsələ təkcə qalib gəlmək deyildi: “Azərbaycanın əldə etdiyi nəticənin mühüm tərəfi ondan ibarətdir ki, hərbi qələbə siyasi məqsədə çevrildi. Qarabağ məsələsinin həlli ilə yanaşı, Azərbaycanın beynəlxalq münasibətlər sistemindəki çəkisi də dəyişdi.

İllərlə “münaqişə tərəfi” kimi təqdim olunan Azərbaycan artıq öz ərazi bütövlüyünü və suverenliyini təmin etmiş dövlət kimi çıxış edir. Bu dəyişiklik ölkənin regional təhlükəsizlik, nəqliyyat, enerji və diplomatiya gündəliyində rolunu da genişləndirib.

Azərbaycanın öz mövqeyini beynəlxalq hüququn ərazi bütövlüyü və suverenlik prinsipləri üzərində qurması da xüsusi əhəmiyyət daşıyır. BMT Təhlükəsizlik Şurasının 1993-cü ildə qəbul etdiyi 822, 853, 874 və 884 saylı qətnamələrində Azərbaycanın suverenliyi və ərazi bütövlüyünə hörmət təsbit edilmişdi.
Beləliklə, Bakının mövqeyindəki əsas dəyişiklik yalnız ərazi üzərində nəzarətin bərpası deyildi. Azərbaycan özünün beynəlxalq hüquqa əsaslanan mövqeyini faktiki siyasi reallığa çevirdi. Əsl siyasi sınaq isə müharibədən sonra başladı. Çünki hərbi qələbəni davamlı sülhə çevirmək, uzunmüddətli qarşıdurmanı siyasi dialoqla əvəzləmək hərbi qələbədən heç də asan məsələ deyil”.

Deputat bildirib ki, Azərbaycan burada da öz strategiyasını dəyişmədən yeni mərhələyə keçdi: “2023-cü ilin sentyabrından sonra Bakı artıq postmünaqişə dövrünün siyasi və hüquqi çərçivəsini formalaşdırmağa başladı. 2025-ci ilin avqustunda Vaşinqtonda Azərbaycan və Ermənistan arasında sülh sazişinin mətni paraflandı və iki ölkə arasında münasibətlərin normallaşdırılması istiqamətində mühüm siyasi addım atıldı. Azərbaycan Prezidenti daha sonra bu prosesi hərbi qələbədən siyasi sülhə keçid kimi xarakterizə edib. Bu baxımdan Azərbaycanın strategiyasının məntiqi belə görünür: əvvəl ərazi bütövlüyü, sonra suverenlik, daha sonra isə davamlı sülh və regional əməkdaşlıq. Bu ardıcıllıq təsadüfi deyil. Çünki möhkəm sülh üçün ilk növbədə dövlətlərin bir-birinin ərazi bütövlüyünü və suverenliyini qəbul etməsi lazımdır”.

Partiya sədrinin sözlərinə görə, “son 200 ilin ən güclü Azərbaycanı” ifadəsi siyasi-publisistik qiymətləndirmədir və onu konkret ölçü ilə sübut etmək mümkün deyil. “Lakin son illərin faktları Azərbaycanın dövlət imkanlarının əhəmiyyətli dərəcədə artdığını göstərir. Bu gün Azərbaycan yalnız ərazi bütövlüyünü bərpa etmiş dövlət deyil. Bakı eyni zamanda enerji, nəqliyyat, regional təhlükəsizlik və diplomatik əlaqələr baxımından Cənubi Qafqazın əsas aktorlarından birinə çevrilib”.