Mingəçevir şəhərində müşahidə olunan güclü külək fəsadlara səbəb olub. Hadisə şəhərin Nəsimi küçəsində qeydə alınıb.
Belə ki, küləyin təsiri nəticəsində yol kənarında yerləşən iri çinar ağacı kökündən qoparaq birbaşa nəqliyyat yolunun üzərinə aşıb. Nəticədə sözügedən ərazidə nəqliyyat vasitələrinin hərəkəti müvəqqəti olaraq məhdudlaşıb, sürücülər çətinliklə üzləşiblər.
Əraziyə dərhal Mingəçevir Şəhər Yaşıllaşdırma və Sanitar Təmizlik İdarəsinin əməkdaşları cəlb olunub. Qısa müddət ərzində ağac hissələrə bölünərək yoldan kənarlaşdırılıb, yaranmış maneə aradan qaldırılıb və nəqliyyatın hərəkəti bərpa edilib.
İlkin məlumata görə, hadisə nəticəsində xəsarət alan olmayıb. Bununla belə, güclü külək şəraiti ilə əlaqədar aidiyyəti qurumlar vətəndaşlara ehtiyatlı olmağı, xüsusilə iri ağacların və köhnə tikililərin yaxınlığında dayanmaqdan çəkinməyi tövsiyə edir.
Qeyd edək ki, son günlər ölkənin bir sıra bölgələrində müşahidə olunan qeyri-sabit hava şəraiti, o cümlədən güclü küləklər oxşar halların baş vermə ehtimalını artırır.
Xəbərlər informasiya