Türkiyənin sabiq gənclər və idman naziri, “Trabzonspor”un keçmiş prezidenti Mehmet Ali Yılmazın oğlu Soner Yılmaz İstanbulun Bebek rayonundakı evində baş verən atışma nəticəsində yaralanıb.
Ölkə.az xəbər verir ki, o, hər iki ayağından xəsarət alıb.
S.Yılmaz xəstəxanaya aparılıb və əməliyyat olunub. Onun ayaqlarından üç güllə yarası aldığı və əməliyyatdan sonra vəziyyətinin yaxşı olduğu bildirilir.
Silahlı basqını təşkil edən şəxsin kimliyi hələlik məlum deyil. Polis onun saxlanılması istiqamətində əməliyyat tədbirlərini davam etdirir.
Qeyd edək ki, Soner Yılmaz Tek-Art Construction şirkətinin Direktorlar Şurasının sədri vəzifəsində çalışır. Şirkət tikinti, podratçılıq və turizm-otel idarəçiliyi sahələrində fəaliyyət göstərir.