Mingəçevir Dövlət Universitetində Azərbaycanın Milli Qəhrəmanı Natiq Qasımovun əziz xatirəsinə həsr olunmuş universitetlərarası voleybol turnirinə start verilib. Tədbir universitet rəhbərliyi, müəllim-tələbə heyəti və idman ictimaiyyətinin nümayəndələrinin iştirakı ilə keçirilib. Turnirin əsas məqsədi gənclər arasında idmana marağın artırılması, sağlam həyat tərzinin təbliği və vətənpərvərlik ruhunun gücləndirilməsidir.
Turnirdə Mingəçevir Dövlət Universiteti, Azərbaycan Dövlət İqtisad Universitetinin Zaqatala filialı, Gəncə Dövlət Universiteti və Azərbaycan Texnologiya Universitetinin tələbələrindən ibarət komandalar iştirak edir. Komandalar turnir çərçivəsində yüksək idman mübarizəsi nümayiş etdirərək birincilik uğrunda mübarizə aparırlar. Oyunlar tamaşaçılar tərəfindən böyük maraqla qarşılanır.
Açılış mərasimində çıxış edənlər Azərbaycanın Milli Qəhrəmanı Natiq Qasımovun Vətən qarşısında göstərdiyi qəhrəmanlıq nümunələrindən bəhs ediblər. Onun keçdiyi şərəfli həyat yolu, torpaqlarımızın müdafiəsi uğrunda göstərdiyi fədakarlıq gənclərə örnək kimi təqdim olunub. Qeyd olunub ki, bu cür tədbirlər gənc nəslin milli-mənəvi dəyərlərə bağlı ruhda formalaşmasında mühüm rol oynayır.
Turnirin təşkilində əsas məqsədlərdən biri də tələbələr arasında dostluq və həmrəylik münasibətlərinin möhkəmləndirilməsidir. Müxtəlif universitetləri təmsil edən gənclər idman meydanında sağlam rəqabət şəraitində mübarizə aparmaqla yanaşı, bir-biri ilə təcrübə mübadiləsi aparırlar. Bu isə universitetlərarası əlaqələrin daha da inkişafına şərait yaradır.
Yarışlar Mingəçevir Dövlət Universitetinin müasir tələblərə cavab verən İdman-Sağlamlıq Kompleksində keçirilir. Kompleksin maddi-texniki bazası idmançıların yüksək səviyyədə çıxış etməsinə imkan yaradır. Oyunlar beynəlxalq voleybol qaydalarına uyğun şəkildə təşkil olunur və hakimlər heyəti tərəfindən obyektiv şəkildə idarə edilir.
Turnir çərçivəsində keçirilən qarşılaşmalar gərgin və maraqlı mübarizə ilə yadda qalır. Hər bir komanda final mərhələsinə yüksəlmək və turnirin qalibi adını qazanmaq üçün bütün gücünü ortaya qoyur. Tələbələrin göstərdiyi əzmkarlıq və komanda ruhu tədbirə xüsusi rəng qatır.
Qeyd edək ki, turnirin final oyunu bu gün saat 16:00-da Mingəçevir Dövlət Universitetinin İdman-Sağlamlıq Kompleksində baş tutacaq. Final qarşılaşmasından sonra qalib və fərqlənən komandalar diplom, kubok və mükafatlarla təltif olunacaq. Bu cür idman tədbirlərinin gələcəkdə də davam etdirilməsi planlaşdırılır.
Esmira Hidayətova, Mingəçevir