Mingəçevir Dövlət Universitetindən Qurban Bayramı Ziyarətləri – Şəhid Ailələrinə Duyğulu Dəstək
Qurban Bayramı münasibətilə Mingəçevir Dövlət Universitetinin bir qrup əməkdaşı tərəfindən mənəvi dəyəri yüksək olan nümunəvi bir təşəbbüs həyata keçirilib. Universitetin nümayəndələri Azərbaycanın azadlığı və ərazi bütövlüyü uğrunda canlarından keçmiş qəhrəmanların ailələrini ziyarət edərək onlara bayram münasibətilə təbriklərini çatdırıblar.
Ziyarət zamanı Birinci Qarabağ Müharibəsinin qəhrəman iştirakçısı, Azərbaycanın Milli Qəhrəmanı Natiq Qasımov, eləcə də 44 günlük Vətən Müharibəsində şəhid olmuş universitet məzunları Kənan Abdullayev, Oruc Nəcəfli və Əzəmi Hüseynovun ailələri ilə görüşlər keçirilib. Bundan əlavə, Mingəçevir şəhərinin igid övladlarından olan şəhid Təbriz Cüməzadə, Aprel döyüşləri zamanı şəhid olmuş Adil Adilzadə, Teymur Qasımov, Rüstəm Əhmədov və Rahim Tağıyevin ailələri də ziyarət olunub.
Universitet nümayəndələri şəhidlərin ailələrinə ehtiramlarını bildirərək, onların övladlarının göstərdiyi qəhrəmanlıqlarla xalqımızın qürur mənbəyi olduğunu vurğulayıblar. Eyni zamanda, şəhidlərin əziz xatirəsinin daim uca tutulacağı, gənc nəslə örnək olaraq yaşadılacağı qeyd olunub.
Bu ziyarət, universitetin və bütövlükdə cəmiyyətin şəhid ailələrinə göstərdiyi diqqət və qayğının bariz nümunəsidir. Qurban Bayramının ruhuna uyğun olaraq, həmrəyliyin, paylaşmanın və mənəvi dəstəyin ifadəsi olan bu təşəbbüs ailələr tərəfindən böyük rəğbətlə qarşılanıb.
Esmira Hidayətova, Mingəçevir
